今次呢篇專欄想講下點解我會由iPad Air 4 換到iPad Mini 6。其實要由我第一部iPad 開始講起。
我既第一部iPad 係iPad 6。我當時買既係iPad 6 Wi-Fi版 32GB 容量。當時我購買既原因係我上堂時可以用黎睇Notes，娛樂時可以睇片睇劇，想打機亦有更大既螢幕。但後來用耐左就覺得呢個螢幕睇片都唔夠大，容量實在太細，想裝多幾隻手遊擺多幾套戲劇就爆左空間。
直至上年，Apple 推出全新設計既iPad Air 4。當中以多色系，窄邊框換取更大螢幕，側邊Touch ID作解鎖方式，USB Type-C 為連接頭 等等，成為賣點吸引到我購買。我當時購買既係 iPad Air 4 Wi-Fi版 256GB。今次當我買大左容量，可以話完全無缺點。
後來使用左大約半年時間，iPad Air 4 實在太好啦。當我係街上需要係配帶口罩進行解鎖，我只需要指紋便可以。睇片睇劇可以擁有更大既螢幕，觀感大大提升。使用USB Type-C 作為連接頭可以比我叉電更快，可以接駁外置硬碟、外置顯示器及滑鼠鍵盤都方便，仲可以比我為iPhone 進行反向叉電。
跟住用耐左，發現原來我好多時都係街上使用iPad，iPad Air 4無比iPad 6 重幾多。但因為螢幕邊框收窄左，拎iPad 既手勢都變動，重量比例唔平均，導致多數時間都需要雙手拎持。當時就幻想如果可以擁有一部相同功能，但更細機身及螢幕既iPad 就好啦。
最終到左2021年9月Apple 正式發佈 iPad Mini 6。
功能可以話有iPad Air 4 既影子，功能大致相同。升級外觀設計，多色系，窄邊框，側邊Touch ID 解鎖，USB Type-C 連接頭。同我所幻想既完全中哂，因為機身縮細，重量只有iPad Air 4 約一半，便携性提高，可以長期單手拎持。
iPad Mini 6 亦被稱為最佳手遊裝置，機身與手掌大細相約，打機起黎唔會禁唔到畫面任何一個制。對於睇片而言，當然都會覺得螢幕唔夠大而唔夠享受。
總結
iPad 對於任何人黎講都有唔同既使用場境。所以Apple 先會不停推出唔同大細既iPad 型號，幫助你尋找最適合自己既iPad。
你可以通過你最常用情境，功能及預算，而得知邊一部iPad 岩你。而我就嘗試過唔同既型號，最終尋找到最岩我既iPad Mini 6.